Troll                  

Troll er Norsk Polarinstitutt sin forskingsstasjon i Antarktis. Vi var seks engasjerte for overvintring i 2007, det første året med ordinær drift.

Webcam  v/NPI  -  f5 for oppdatering                 

Stasjonen ligg på 72 grader sør, i Dronning Maud Land. Nærmare bestemt på 1300 meters høgde i fjellområdet Jutulsessen. 

Sjå satellittfoto. - Zoom inn for detalj. (Du må ha Google Earth)

Troll var bygd som ein enkel sommarstasjon i 1990. Den første overvintringa skjedde i 2000 då Norsk Sydpolekspedisjon fekk bruke stasjonen som utgangspunkt for turen.
Sørsommaren 2004-20005 vart anlegget kraftig utvida. Samtidig vart Troll Airfield, ein 3 kilometer lang flyplass på blåis etablert, og dei første flya med hjul kunne lande. Ikkje alt vart ferdig, men nok til at første overvintringa i ny stasjon kunne gjerast. Dei to neste somrane kom resten på plass, og med nytt kraftverk, forskingsutstyr og kommunikasjon vart 2007 den første vinteren med ordinær drift.

Været er nesten alltid fint. Antarktis er kaldt og tørt, og sjølv om 94 prosent av verden sitt ferskvatn ligg lagra i isen har det meste av kontinentet ørkenklima. Troll har 25 kuldegrader som årsgjennomsnitt, men på ein normal sommardag med steikande sol og ekstremt tørr luft merkar ein lite av 10 kuldegrader. Temperaturen kan nå opp i null om sommaren, og gå ned til minus 40 om vinteren. Enkelte stormar gjer uteaktivitet umulig, det kan skje heile året. Mørketida er omlag som i Nord-Norge.

Kysten er av is. Havet bryt mot Shelfen, eit loddrett, skinnande isstup. Her kryr det av pingvin, sel, kval og sjøfugl. Vidare er det flatt femti kilometer innover, for her flyt isbremmen på havet. Så byrjar landet å heve seg under isen. Hengslingssona har enorme bresprekker, så her skal ein passe seg. Vidare er det hundre kilometer slakk motbakke før ein når tindelandet, der fjella stikk opp av isen som raudbrune øyer. Og bak fjella, i 3000 meters høgd ligg Sydpolplatået.

Dronning Maud Land er forma som eit svært kakestykke med ein butt spiss mot Sørpolen. Området er norsk biland, det vil seie at Norge gjer krav på området, men at det ikkje er anerkjent internasjonalt. Seks andre land har liknande krav, mens 44 har signert Antarktistraktaten. Antarktis er ikkje del av noko land, så det er traktaten som regulerer bruken. Den har mellom anna strenge miljøkrav og forbod mot militær aktivitet.

Ved Troll har det vore forska innan glasiologi, geologi og klima. Breane i Antarktis fungerer som klimaarkiv, sidan innlandsisen inneheld luft frå opptil ein million år tilbake. Endringar i ismassen seier også mykje om klimaet. På nye Troll har Norsk institutt for luftforsking eit større anlegg. Her er dessutan meteorologisk stasjon, levert av Meteorologisk Institutt og utstyr for stråling og bakketemperatur. Utstyr frå British Antarctic Survey er plasserast på Troll mens engelskmennene byggjer ny stasjon.

Bistasjonen Tor ligg ved Svarthammaren, 100 kilometer frå Troll. Her studerer ornitologar verdens største koloni av antarktispetrell, ein sjøfugl som flyg langt inn i landet for å hekke. Det same gjer snøpetrellen, mens sørjoen lever godt på dei andre.

Den nye flyplassen gjer logistikk ved forskingsprosjekt enklare og i det Internasjonale Polaråret 2007-2008 er Troll utgangspunkt for ein sydpoltravers i samarbeid med USA. Det skal mellom anna borast iskjerner i nye område på veg til Amundsen-Scott basen.

Trond Løvdal. Hårek Bartnæs. Ola Storrø. Odd Arne Røst.

Johan Hustadnes. Leif Morten Tangen.